Адыгэ къэралыгъо университетымрэ Дюзджэ университетымрэ илъэсих хъугъэу тызэгъогогъоу тызэдэлажьэ. Адыгэ лъэпкъым ыбзэ, илитературэ ахэдгъэхъоныр, ыпэкӀэ лъыдгъэкӀотэнхэр типшъэрылъ шъхьаӀэу тэлъытэ ыкӀи непи зэпымыоу ащ тыдэлажьэ.
Тегъэразэ ыкӀи тегъэгушхо адыгабзэмрэ Ӏэдэбыятымрэ язэгъэшӀэн Дюзджэ университетым пытэу ылъэ зэрэщытеуцуагъэм. «Джырэ адыгэм идунай» зыфиӀорэ Дунэе Фестивалым лъэпкъ культурэр зэрэбаир, ар зезыхьэрэ адыгабзэр зэрэкуур къыгъэлъэгъуагъ. Симпозиумым лъагъо фэхъугъэхэу профессорэу КӀэрэщэ Зейнаб игущыӀэхэу «Бзэр лъэпкъым ыпсэ зан» Фестивалым къыгъэшъыпкъэжьыгъ.
Симпозиумэу екӀокӀыгъэм узэгупшысынэу Ӏофыгъуабэу къыщаӀуагъэр бэ. ЕплъыкӀэ-екӀолӀэкӀэ зэфэшъхьафхэу къаӀуагъэхэр мы тхылъым къыдахьэх. ЗэкӀэ еджэхэрэм ашӀоӀофынэу тэгугъэ, яшӀошӀхэр къэкӀорэ зэӀукӀэгъум нэс къыднагъэсымэ лъэшэу тигопэщт.
Дюзджэ Унтверситетым иӀэшъхьэтетхэу, иегъэджакӀохэу, иеджакӀохэу мы блэкӀыгъэ СимпозиумитӀур зыӀэтыгъэхэм, Дюзджэ ицӀыфхэу къыддэулэугъэхэм шъхьэкӀэфэ ин афэтшӀызэ тызэрафэразэр хэтэгъэунэфыкӀы.
«Узэкъотмэ – улъэш»,- еӀо адыгэ гущыӀэжъым. Тизэкъотныгъэ нахь пытэнэу тэгугъэ.
Адыгэ къэралыгъо университетым иректорэу
Мамий Дауд
