Лъытэныгъэ зыфэтшIырэ тихьакIэ лъапIэхэр!
АФ2019 Адыгэ Филологиер- II «Непэрэ адыгэм идунай» зыфиIорэ шIэныгъэ Симпозиумум шъухэлэжьэнэу шъукъызэрэкIуагъэм пае фэсапщ къышъотэIо, шъхьакIафэ къышъуфэтэшIы, ыкIи сэлам гуапэр шъотэхы.
Тиадыгэбзэ къутамэ гъогоу къыкIугъэр кIэкIэу шъозгъэшIэнэу сыфай. Дюзджэ Университетым ШIэныгъэ ыкIи Литературэ Факултетым епхыгъэ Адыгэбзэ къутамэр 2013 илъэсым къызэIуахыгъ. Непэ мы къутамэм студентэу, магистуратэу, аспирантэу нэбгырэ 132 –рэ щеджэ. Адыгэбзэ къутамэр апэрэеу къэзыухыгъэхэр 2017 илъэсым къычIэкIыгъэх. Непэ нэсэу магистуратурэр къэзыухыгъэр нэбгырий мэхъу. Дюзджэ Университетымрэ Адыгэ къэралыгъо университетымрэ зэдашIыгъэ протоколым тетэу студент нэбгырищ мыгъэ Адыгеим кIуагъэх. Илъэсныкъо Адыгэ Къэралыгъо Университетым щеджэщтых.
ТихьакIэ лъапIэхэр!
Ным бзэр кIалэм зэриIулъхьарэр хэткIи нафэ. Апэрэ гущыIэхэр тэзыгъашIэрэр ныр ары. Ащ пай дунаем тет зэфэшъхьаф цIыф лъэпкъхэм ным шъхьакIафэ фашIы. Ахэмэ ащыщ адыгэхэри.
Адыгэмэ бзылъфыгъэм лытэныгъэшхо зэрэфашIырэр яхабзэмэ къагъэлъагъо. Адыгэ хабзэр Темыр Кавказым итыгъэкъохьапIэ щагъэпсыгъ. Адыгэ цивилизациери бзылъфыгъэм епхыгъэу щыт. Лъэпкъыр итэкъухьагъэ хъугъэми бзылъфыгъэм лытэныгъэшхо зэрэфашIрэм пае лъэпкъыри къэнэжьыгъ. Бзылъфыгъэм шъхьакIафэ зэрэфэтшIырэм фэдэу тыбзи дгъэлъэпIэн фае.
Адыгабзэм, хабзэм, литературэм, тарихъым Дюзджэ Университетым и Адыгабзэ къутамэ щырагъаджэх. Адыгэ хабзэри Тыркуем илъ нэмыкI хабзэмэ афэдэу зы хабзэу щыт. Ащ къыхэкIыкIэ тихабзэ афэтIотэн тлъэкIыщт.
Ти Симпозиум къекIолIагъэхэр!
Адыгэбзэ къутамэр къызызэIуахым ти Университет иректорыгъэр Фунда Сиврикая ЩерифIоглум; Адыгеим къикIыгъэ кIэлэегъаджэхэр къэзгъэкIуагъэу, а уахътэм ректорэу щытыгъэр Хъунэго Рэщыд; Мы Симпозиумыр едгъэкIокIыным пае протокол ашIи, аIэ къыхьырэмкIэ хэлэжьагъэхэу Дюзджэ Университетым иректорэу Нигар Демирджан Чакар ык1и Адыгэ Къэралыгъо Университетым иректорэу Мамый Даудэ лъэшэу тафэраз.
ТихьакIэ лъапIэхэр! Ти Симпозиум шъукъызэрэкIуагъэм пае тхьэшъуегъэпсэу шъотэIо.
Dr. Öğr. Üyesi Fehmi Altın
Kafkas Dilleri ve Kültürleri Bölümü Başkanı
